ဖြစ်စဉ်အဖွင့်
၁၉၆၁ ခုနှစ် ဖေဖော်ဝါရိ(၁၃)ရက်နေ့တွင် ရှမ်းပြည်နယ်ဝမ်ပန်ဆန်းဒေသ လွယ်တော်ခန်းနှင့်လွယ်ခန်းရှိုးရှိ တရုတ်ဖြူတို့ အားလက်နက်ခဲယမ်းနှင့်ရိက္ခာများကို အင်အားကြီးတနိုင်ငံမှဝေဟင်မှပေးပို့ ချထားပေးခဲ့ကြောင်း အထောက်ထားများကို တွေ့ရှိခဲ့ရသည်။ ၁၅-၂-၆၁ရက်နေ့က ကျိုင်းတုံတွင်တပ်စွဲထားသော မြန်မာ့တပ်မတော်(လေ)မှ ဆီးဖြူရီတိုက်လေယာဉ် အုပ်စုမှူး ဗိုလ်မှူးသူရတင်မောင်အေး (ဗိုလ်မှူးကြီးအငြိမ်းစား)သည် စက်ဆနာလေယာဉ်ဖြင့် ကင်းထောက်ပျံသန်းနေစဉ် တာချီလိတ်အနောက်ဘက် ၀မ်းပန်ဆန်းဒေသတွင် DZ (Dropping Zone= ဝေဟင်ပစ္စည်းချရန်အမှတ်အသား)ကို တွေ့ရှိခဲ့ရသည်။ ယခင်နေ့များကလည်းပစ္စည်းချပေးခဲ့ပြီး ယနေ့တွင်လည်းပစ္စည်းချရန်အစီစဉ်ရှိ၍သာ DZ အမှတ်အသား ခင်းထားခြင်းဖြစ်ကြောင်း ဗိုလ်မှူးသူရတင်မောင်အေးမှ သုံးသပ်လိုက်ပြီးကျိုင်းတုံသို့အမြန်ပြန်ခဲ့သည်။
ဖြစ်စဉ်
ဗိုလ်မှူးသူရတင်မောင်အေးသည် ကျိုင်းတုံသို့ပြန်ရောက်လျှင်ရောက်ချင်း ဆီးဖြူရီလေယာဉ်အမှတ် (UB464) မောင်းနှင်သော ဗိုလ်မောင်သိန်းခေါင်းဆောင်ပြီး (UB466)မောင်းနှင်သောဒုတိယဗိုလ်ပီတာနှင့် (UB465)မောင်းနှင်သော ဗိုလ်ချစ်ခိုင်တို့ပါဝင်သည့် ဆီးဖြူရီတိုက်လေယာဉ်(၃)စီးပါအုပ်အား DZတွေ့ရှိခဲ့ရသောနယ်မြေသို့ စေလွတ်ခဲ့သည်။ ဗိုလ်မှူးသူရတင်မောင်အေးသည် သူကိုယ်တိုင်လိုက်ပါရန်ဖြစ်သော်လည်း သူဆောင်းနေကျလေသူရဲဦးထုပ် တပ်မဟာရုံးတွင် ကျန်ရစ်ခဲ့သဖြင့် သွားယူနေလျှင်နောက်ကျမည်ဖြစ်သဖြင့် ဗိုလ်မောင်သိန်းအားခေါင်းဆောင်စေကာ စေလွှတ်လိုက်ခြင်းဖြစ်သည်။ ရန်သူ့လေယာဉ်ကိုတွေ့လျှင် ကျိုင်းတုံလေယာဉ်ကွင်းသို့ ဖမ်းဆီးခေါ်ဆောင်ခဲ့ရန် ညွှန်ကြားခဲ့သည်။ ဗိုလ်မောင်းသိန်းခေါင်းဆောင်သည့် လေယာဉ်(၃)စီးသည်ဝမ်ပန်းဆန်းနယ်မြေပေါ်သို့ မွန်းလွဲ (၃)နာရီခွဲခန့်တွင် ရောက်ရှိခဲ့ကြသည်။ ရန်သူ့လေယာဉ်အားရှာဖွေရင်း စောင့်ဆိုင်းနေကြစဉ် ညနေ(၄)နာရီခန့်တွင် အရှေ့မှအနောက်သို့ စက်လေးလုံးတပ်လေယာဉ်ကြီးတစင်း ၀င်ရောက်လာသည်ကိုတွေ့ရှိခဲ့ကြသည်။ ဗိုလ်မောင်သိန်းက အဆိုပါလေယာဉ်အားအဖမ်းခံရန် ရေဒီယိုဖြင့်အကြောင်းကြားရာ မလိုက်နာသည့်အတွက် နောက်မှလိုက်၍ အနီးကပ်ကြည့်နေစဉ် အဆိုပါလေယာဉ်ကြီးမှစတင်ပစ်ခတ်သဖြင့် ဗိုလ်မောင်သိန်းက ပြန်လည်တိုက်ခိုက်ခဲ့သည်။ ဗိုလ်ပီတာနှင့်ဗိုလ်ချစ်ခိုင်တို့အားလည်း မိမိအားပစ်ခတ်နေကြောင်းနှင့် လေယာဉ်ကြီးအားဝိုင်းဝန်းတိုက်ခိုက်ကြရန် အမိန့်ပေးခဲ့သည်။ မိမိလေယာဉ်(၃)စီးမှ ပထမအချိန်တိုက်ခိုက်စဉ်မှာပင် လေယာဉ်ကြီးမှပစ္စည်းတထုပ်ကို လေထီးဖြင့်ချလိုက်ပြီး မီးကျည်တောင့်(Tracer)များဖြင့် ပြန်လည်ပစ်ခတ်ခဲ့ပါသည်။ မိမိလေယာဉ်(၃)စီးသည် ဒုတိယအကြိမ် ဆက်လက်တိုက်ခိုက်ကြပြန်ရာ ဗိုလ်ချစ်ခိုင်၏လေယာဉ်အမြီးပိုင်းကို လေယာဉ်ကြီးမှပစ်ခတ်လိုက်သော ကျည်ထိမှန်သွားပါသည်။ တချိန်တည်းမှာပင် ဗိုလ်ပီတာ၏“ကိုယ့်လေယာဉ်ထိသွားပြီ” ဟု အသံကြားလိုက်ရပြီး ဗိုလ်ပီတာအား နောက်ထပ်ဆက်သွယ်၍မရတော့ပဲ အသံပျောက်သွားပါသည်။ ဗိုလ်ပီတာ၏လေယာဉ်သည် မိမိနယ်နိမိတ်နှင့် ၈ မိုင်ခန့်ဝေးသော ထိုင်းနိုင်ငံအတွင်းဆင်းသက်နိုင်ခဲ့သော်လည်း မီးလောင်ပျက်စီးသွားခဲ့ကာ ဗိုလ်ပီတာလည်းကျဆုံးသွားခဲ့သည်။ ဗိုလ်မောင်သိန်းက တတိယအကြိမ်ဆက်လက်တိုက်ခိုက်ရာ စက်လေးလုံးတပ် လေယာဉ်ကြီးသည် အမြီးပြုတ်ထွက်ပြီး မီးဟုတ်းဟုတ်းတောက်ကာ အောက်သို့စိုက်ကျသွားပါသည်။ အဆိုပါ ရန်သူ့လေယာဉ်ကြီးပျက်ကျသွားသည့်နေရာမှာ ထိုင်းနိုင်ငံအတွင်းပင်ဖြစ်သည်။
ဖြစ်စဉ်နိဂုံး
တပ်မတော်(လေ)မှပစ်ချခဲ့သော စက်လေးလုံးတပ်ရန်သူ့လေယာဉ်ကြီးပုံသဏ္ဍာန်မှာ High Wings Single Fan with Defensive Armament ဖြစ်၍ B24 မှဆင်းသက်လာသည့် P4Y3 DRAVATEER လေယာဉ်ဖြစ်ပါသည်။ လေယာဉ်ကြီးတွင် ဒဿမ၅၀ကျည်သုံး စက်သေနတ်ကြီး (ပွိုင့်ဖိုက်ပေါ့) ၁၂လက်ကို တပ်ဆင်ထားပါသည်။ ဗိုလ်ချစ်ခိုင်၏ လေယာဉ်နောက်မြီးအောက်ပိုင်းတခုလုံး ကြေမွပျက်စီးသွားသည့်အပြင် ဘီးလည်းပြုတ်ထွက်သွားခဲ့သည်။ ဗိုလ်ချစ်ခိုင်၏ လေယာဉ်ကိုဗိုလ်မောင်သိန်းမှ ခေါ်ဆောင်လာပြီး ကျိုင်းတုံကွင်းတွင်ဘီးမချပဲ ၀မ်းဗိုက်ဖြင့်ဆင်းသက်ခဲ့ရသည်။ ဗိုလ်ချစ်ခိုင် ထိခိုက်ဒဏ်ရာရခြင်းမရှိပါ။ အဆိုပါလေသူရဲ(၃)ယောက်စလုံးအား နိုင်ငံတော်မှ“သူရဘွဲ့”ကို ချီးမြှင့်ခဲ့သည်။ အဆိုပါကိစ္စကြောင့် ကုလသမဂ္ဂတွင်တရုတ်ဖြူကျူးကျော်မှုကို တရားဝင်တိုင်တန်းပြီး အင်အားကြီးနိုင်ငံတခု၏ပါဝင် ပတ်သက်မှုကို မီးမောင်းထိုးပြနိုင်ခဲ့သည်။
(တပ်မတော်(လေ)သမိုင်းမှကောက်နုတ်တင်ပြထားပါသည်)
No comments:
Post a Comment