စစ်သားချစ်သူဆိုတာကို ဘယ်သူက နားလည်ပေးနိုင်မှာလဲ။
ပတ်ဝန်းကျင်က ဘယ်လို ပြောပြော ချစ်သူသာ ကိုယ့်အပေါ်မှာ သစ္စာရှိရှိ
ချစ်နေတယ်၊ သတိတရ ရှိနေတ်ာဆိုရင် ဘေးပယောဂတွေကို
ကျွန်မရင်ဆိုင်ရဲပါတယ်လေ။ တစ်ခါတစ်လေ မန္တလေးသွားမယ်လို့ ပြောသွားပြီး
တောင်ကြီးရောက်ချင် ရောက်သွားတတ်တာ။ အမိန့်ပဲလေ။ မင်းခယောက်ျား၊
ကမ်းနားသစ်ပင်။ ထားရာနေ စေရာသွားပါတဲ့။ ချစ်သူဆိုပြီး သူ့လက်ကလေးတွေတောင်
ကိုင်ဖူးဖို့မပြောနဲ့၊ ချစ်သူအသား ဖြူနေလား၊ မည်းနေလားတောင်
ကျွန်မသေချာမမြင်ရသေးတဲ့ဘ၀ပါ။ ချစ်မိမှတော့ သက်ဆုံးတိုင်ပေါ့ ချစ်သူရယ်။
စစ်သားချစ်သူမို့ ပေဖူးကို ဆီမလူးနိုင်ပါလို့ပဲပြောပြီး ဂုဏ်ယူတတ်အောင်ပဲ
လေ့ကျင့်ထားလိုက်ပါတော့မယ်။
တကယ်တော့လည်း
သူ့ကို သနားမိတယ်။ သူတို့ခမျာလည်း ယောက်ျားတွေထဲက ယောက်ျားပါပဲ။
သူများတွေလို ချစ်သူဘ၀ ပျော်ချင်မှာပေါ့။ ချစ်သူလက်ကိုတွဲပြီး
အရပ်ရှစ်မျက်နှာ နေရာအနှံ့ လည်ချင်ရှာမှာပေါ့။ ကိုယ့်ချစ်သူအပေါ်
ယုယကြင်နာမှုတွေ အပြည့်အ၀ ပေးချင်ရှာမှာပေါ့။ ဒီလို ယုယမှုတွေ
မပေးနိုင်တဲ့အတွက် မိန်းကလေးတစ်ယောက် စိတ်ပျက်ပြီး စွန့်ခွာသွားမှာကိုလည်း
စိတ်ပူနေရှာပြန်တယ်။ သူ့ထက်စာရင် ပြည့်စုံမှုတွေ ပေးနိုင်မယ့်သူကို
မရွေးချယ်လိုက်ပါနဲ့လို့ မတားရက်ပေမယ့် ထားသွားပါလို့လည်း
မစွန့်လွှတ်ရက်ဖူးတဲ့လေ။ ချစ်နိုင်တာခြင်း တူပေမယ့် ပေးဆပ်နိုင်တာခြင်း
ကွာခြားတဲ့အခါ အနည်းနဲ့အများတော့ ခံစားကြရတာပါပဲ။
ဒါပေမယ့်
ကျွန်မချစ်သူဟာ စစ်သားပါ။ နှစ်ဆယ့်လေးနာရီ တာဝန်အပြည့်ရှိနေတဲ့
သူတစ်ယောက်မို့ သူများလို ချစ်သူအတွက် အချိန်များများ မပေးနိုင်တာကို
နားလည်တတ်ပါတယ်။ စစ်သားနှလုံးသားလည်း ချစ်တတ်ပါသေးတယ်။ အခွင့်အရေးဆိုတာ
မရသေးလို့ပါ ချစ်သူရယ်လို့ နှစ်သိမ့်တတ်တဲ့ ချစ်သူကို သနားနေမိတယ်။
အဲ့ဒီအတွက်လည်း ကိုယ့်ကိုယ်ကို စိတ်မာအောင် လေ့ကျင့်ရမယ်လို့ သိတတ်ခဲ့တယ်။
သူများတွေလို ချစ်သူရင်ခွင်မှာ ပါးအပ်ပြီး ငိုနေဖို့ ကျွန်မမှာ
အခွင့်အရေး မရှိသလောက် နည်းပါးတယ်လေ။ ချစ်သူရင်ခွင်မှာ ချွဲနွဲ့နေဖို့၊
ချစ်သူပုခုံးကိုမှီပြီး ငိုရှိုက်နေဖို့ ချစ်သူရဲ့ပုခုံးမှာ
တာဝန်ဆိုတာကြီးက ကျွန်မ့ရှေ့မှာ အမြဲတမ်း အရင်ရောက်နေခဲ့တယ်။ သူများတကာတွေ
ချစ်သူသက်တမ်း တစ်နှစ်ပြည့်တို့၊ နှစ်နှစ်ပြည့်တို့မှာ တူတူတွဲပြီး
အမှတ်တရ တွေ့ဆုံတတ်ကြပေမယ့် ကျွန်မချစ်သူကတော့ ဘယ်နေ့က သူ့ကို
အဖြေပေးခဲ့လဲဆိုတာတောင် အမှတ်ရပါ့မလားမသိ။ တစ်လပြည့်လည်း
ကျွန်မတစ်ယောက်တည်း။ ခြောက်လပြည့်လည်း တစ်ယောက်တည်းပါပဲ။ စစ်သားချစ်သူ
အသည်းနုပေမယ့် စိတ်တော့မာမှ ရတော့မပေါ့။
တပ်မှာနေရင်လည်း
နေထိုင်ကောင်းပါရဲ့လား၊ အလုပ်တွေပဲ များနေလားလို့ စိတ်ပူပြီး
ကျွန်မတစ်ယောက် မနေတတ်မထိုင်တတ်ဖြစ်ရတယ်။ ရှေ့တန်းသွားတယ်လို့
သတင်းကြားမိရင်လည်း စိတ်ပူရပြန်တယ်။ ဘုရားမှာ ဆုတောင်းရတာလည်း သူများတောင်
အမြင်ကတ်ပါတယ်။ သူတို့မှ မခံစားဖူးတာနော်။ ဘယ်နားလည်ကြမလဲ။ ယတြာတွေ
ချေရတာလည်း စုံလို့ပါပဲ။ ရင်ထဲက အပူကို ဘယ်သူမှ မသိနိုင်ကြဖူးလေ။
သည်းတယ်၊ ကဲတယ်လို့ ပြောခံရတဲ့အခါ အပြောမခံချင်ပေမယ့် ခံရတယ်။ သူများတွေ
ချစ်သူရှိလို့ ချစ်သူနဲ့ အမြဲတတွဲတွဲနေကြတိုင်း ချစ်သူရှိရက်နဲ့
ကျွန်မချစ်သူဟာ ဘယ်သူလဲ ဆိုတာတောင် ထုတ်ပြစရာ လူက ဘယ်နားက သွားဆွဲခေါ်လို့
ခေါ်ရမှန်း မသိတဲ့အခါ ယောက်ျားတစ်ယောက်က ခဏတာ အပျော်တွဲခဲ့ပြီး
ခြေရာဖျောက်ခံနေရတဲ့ မိန်းကလေးတစ်ယောက်လို့လည်း မြင်ကောင်းမြင်ကြတယ်။
သူ့ဆီက စာမလာ၊ သတင်းမကြားတာ ကြာနေလို့ ကိုယ်က စိတ်ပူပြီး စုံစမ်းမိရင်လည်း
မိန်းကလေးတစ်ယောက်က အရာရှိတစ်ယောက်ကို ကောက်ကောက်ပါအောင်
လိုက်နေရသလိုလည်း ပြောခံကောင်းခံရရဲ့။ သြော်... စစ်သားချစ်သူလေ။ အစက
ဒီလိုတွေ မသိခဲ့ပါဘူး ချစ်သူရယ်။ ကျွန်မသိတာ သူ့ကို ချစ်တာ တစ်ခုတည်းပါပဲ။
သူ့ကို ချစ်တာ တစ်ခုတည်းအတွက် အစစအရာရာ ပေးဆပ်ထားရပြီ။
ချစ်သူသက်တမ်း
ခုနှစ်လတဲ့။ ဝေးရတဲ့ ရက်တွေ ကြာရှည်တော့ နီးချင်ပြီ ချစ်သူရယ်။
လွမ်းရတယ်။ ဆွေးရတယ်။ အားငယ်တယ်။ မိန်းကလေးတစ်ယောက်အတွက်
ကိုယ့်ချစ်သူကိုသာ အာကိုးချင်တာ သဘာဝပါပဲ။ ချစ်သူအနားမှာ ဘယ်တော့မှ
နေခွင့်ရနိုင်မလဲ။ ချစ်သူအနားမှာ ချစ်သူကို ပြုစုယုယရင်း ကြင်နာမှုတွေကို
ပေးချင်ပါရဲ့။ ချစ်သူရဲ့ ချစ်ခင်ယုယမှုတွေကို ရိုးသားစွာ တောင့်တမိပါရဲ့။
ချစ်သူရင်ခွင်မှာ ကလေးလေးတစ်ယောက်လို မှေးစက်ချင်ပါရဲ့။ ဘယ်တော့များမှ
ဒီအခွင့်အရေးကို ရနိုင်ပါ့မလဲ။
...................................
15.09.2011
Credit to : ခက်ဆု
No comments:
Post a Comment